मुंबई महानगरपालिकेने (BMC) डेंग्यू, मलेरिया यांसारख्या डासजन्य आजारांवर नियंत्रण मिळवण्यासाठी “मुव्वी ट्रॅप” ही नवी आणि पर्यावरणपूरक संकल्पना सादर केली आहे. पारंपरिक पद्धतींप्रमाणे डास मारण्यावर भर न देता, ही यंत्रणा डासांच्या प्रजनन प्रक्रियेवरच नियंत्रण ठेवते.
ही अभिनव योजना ‘सोसायटी फॉर मुंबई इन्क्युबेशन लॅब टू एंटरप्रेन्योरशिप’ (SMILE) उपक्रमांतर्गत आयोजित कार्यक्रमात सादर करण्यात आली. अतिरिक्त आयुक्त अविनाश ढाकणे यांच्या हस्ते या उत्पादनाचे अनावरण करण्यात आले. यावेळी उपस्थित तज्ज्ञ आणि शास्त्रज्ञांनी अशा तंत्रज्ञानामुळे डास नियंत्रणासाठी प्रभावी मदत होऊ शकते, असे मत व्यक्त केले.
“मुव्वी ट्रॅप” हे उपकरण विशेष आकर्षक द्रव्य आणि सौम्य कीटकनाशकाच्या मदतीने मादी डासांना आकर्षित करते. डास या ट्रॅपमध्ये अंडी घालतात, मात्र त्यातील कीटकनाशकामुळे ही अंडी नष्ट होतात. त्यामुळे डासांची पुढील पिढी निर्माण होण्यापूर्वीच रोखली जाते.
या ट्रॅपचा प्रभाव साधारण चार आठवड्यांपर्यंत टिकतो आणि यासाठी वीजेची आवश्यकता नसते. त्यामुळे हे उपकरण किफायतशीर असून वापरण्यास सोपे आहे. तसेच यामध्ये वापरलेले घटक मानवी आरोग्यास सुरक्षित असल्याचे महापालिकेकडून स्पष्ट करण्यात आले आहे.
डासजन्य आजारांवर नियंत्रण मिळवण्यासाठी ही नवीन पद्धत मोठ्या प्रमाणात उपयुक्त ठरण्याची शक्यता व्यक्त केली जात आहे.
हेही वाचा
