महाराष्ट्र मंत्रिमंडळाने मंगळवारी कोकण रेल्वेवरील सावंतवाडी रेल्वे स्थानकाला ज्येष्ठ समाजवादी नेते आणि माजी केंद्रीय रेल्वेमंत्री मधु दंडवते (Madhu Dandavate) यांचे नाव देण्यास मंजुरी दिली.
कोकण रेल्वे प्रकल्प साकारण्यात त्यांच्या महत्त्वपूर्ण योगदानाची दखल घेत हा निर्णय घेण्यात आला आहे. केंद्र सरकारची अंतिम मंजुरी मिळाल्यानंतर स्थानकाचे नाव ‘लोकमान्य मधू दंडवते रेल्वे टर्मिनस’ असे करण्यात येणार आहे.
मुख्यमंत्री कार्यालयाने जारी केलेल्या निवेदनानुसार, मधू दंडवते यांनी कोकण भागातील रेल्वे कनेक्टिव्हिटीसाठी सातत्याने पाठपुरावा केला. रखडलेल्या कोकण रेल्वे प्रकल्पाला गती देण्यात महत्त्वाची भूमिका बजावली.
1977 मध्ये जनता पक्ष सरकारमध्ये रेल्वेमंत्री म्हणून त्यांनी रेल्वे आरक्षणाचे संगणकीकरण, स्लीपर डब्यांमध्ये गादीयुक्त बर्थ आणि कोकण रेल्वेच्या पहिल्या टप्प्याला मंजुरी यांसारखे महत्त्वाचे निर्णय घेतले होते.
दरम्यान, मंत्रिमंडळाने डोंबिवलीतील सागाव-सोनारपाडा परिसरातील 4.25 एकर भूखंडावरील अतिक्रमित बांधकामे नियमित करण्यास आणि तो भूखंड नाममात्र दरात श्री पिंपळेश्वर देवस्थान ट्रस्टला हस्तांतरित करण्यासही मंजुरी दिली आहे. हा प्रस्ताव महाराष्ट्र औद्योगिक विकास महामंडळाने (MIDC) राज्य सरकारकडे पाठवला होता.
राज्य सरकारने स्पष्ट केले की हा निर्णय अपवादात्मक स्वरूपाचा असून भविष्यात तो पायंडा म्हणून वापरला जाणार नाही. तसेच MIDC ला आपल्या जमिनीवरील अतिक्रमणांबाबत स्वतंत्र धोरण तयार करण्याचे निर्देश देण्यात आले आहेत.
हेही वाचा
