मुंबईतील बांद्रा कुर्ला कॉम्प्लेक्स (BKC) परिसरात सुरू असलेल्या मुंबई मेट्रो लाईन 2B च्या कामादरम्यान मोठी दुर्घटना घडली. प्रीकास्ट बीम उचलताना क्रेनचा तोल जाऊन ती उलटली.
ही घटना रात्रीच्या कामादरम्यान एशियन हार्ट हॉस्पिटल जंक्शन जवळ घडली. सुमारे 400 टन क्षमतेची मोबाईल क्रेन बीम उचलत असताना यांत्रिक बिघाड झाल्याचे प्राथमिक माहितीमध्ये समोर आले आहे. बीम अस्थिर झाल्याने वजनाचा ताळमेळ बिघडला आणि क्रेन कोसळली.
घटनेनंतर काम तात्काळ थांबवण्यात आले असून आपत्कालीन पथके घटनास्थळी दाखल झाली. परिसर सुरक्षित करण्यात आला असून ढिगारा हटवण्याचे काम सुरू आहे. तसेच, अपघाताचे नेमके कारण शोधण्यासाठी तपास सुरू करण्यात आला आहे.
या घटनेमुळे बीकेसीसारख्या गजबजलेल्या व्यावसायिक भागात काही काळ वाहतूक विस्कळीत झाली. वाहतूक पोलिसांच्या सल्ल्याने पर्यायी मार्गांवर वाहतूक वळवण्यात आली आहे.
मुंबई महानगर प्रदेश विकास प्राधिकरण (MMRDA) ने दिलेल्या माहितीनुसार, या अपघातात कोणतीही जीवितहानी झालेली नाही. उलटलेली क्रेन हटवण्यासाठी 600 टन क्षमतेची दुसरी क्रेन घटनास्थळी आणली जात आहे.
अधिकाऱ्यांकडून या घटनेची सखोल चौकशी केली जाणार असून तांत्रिक बिघाड, कामातील त्रुटी किंवा सुरक्षा नियमांचे उल्लंघन यापैकी नेमके कारण काय आहे, याचा शोध घेतला जाणार आहे.
मुंबई मेट्रो लाईन 2B हा महत्त्वाचा प्रकल्प असून तो शहरातील पूर्व-पश्चिम दळणवळण अधिक सक्षम करण्यासाठी उभारला जात आहे.
हेही वाचा
