बेलापूर विधानसभा मतदारसंघातील मतदार याद्यांमधील घोळ मनसेने उघड केला आहे. मनसेने तब्बल 33,000 हून अधिक संशयास्पद मतदारांची यादी निवडणूक अधिकाऱ्यांकडे सादर केली आहे. मनसेचा आरोप आहे की मतदार यादीत मोठ्या प्रमाणावर हेराफेरी करण्यात आली आहे.

मनसेनुसार, 15,000 हून अधिक नोंदी या डुप्लिकेट असून आणखी 18,403 नावे बनावट आहेत. यातील अनेकांचा पत्ता अपूर्ण, चुकीचा किंवा अगदी विनोदी स्वरूपाचा आहे. मनसेला तर नवी मुंबईतील जुईनगर येथे सुलभ शौचालय हा पत्ता असलेला मतदार सुद्धा आढळला.

मनसेचे शहराध्यक्ष गजानन काळे म्हणाले, “अशा शेकडो नोंदी आमच्या निदर्शनास आल्या आहेत. सानपाड्यातील पाम बीच रोडवरच 200 पेक्षा जास्त मतदारांचे पत्ते पाम बीच रोड, सानपाडा असेच नमूद आहेत. घर क्रमांक, इमारत नाव काहीच नाही. आम्ही स्थानिक रहिवासी आणि दुकानदारांशी चौकशी केली, पण या नावांची कुणालाच माहिती नव्हती. स्थानिकांनाच माहिती नसताना ही नावे मतदार यादीत कशी आली?”

मनसेने ही नवीन तक्रार सादर करण्यापूर्वी एक वर्षापूर्वीही अशाच नावांची यादी निवडणूक अधिकाऱ्यांना दिली होती.

काळे म्हणाले, “लोकसभा निवडणुकीनंतर विधानसभा निवडणुकीत 7–8 लाख नावे मतदार यादीत जोडली गेली. आमचे नेते राज ठाकरे आणि महाविकास आघाडीचे नेते बनावट आणि डुप्लिकेट नावांच्या मुद्द्यावर सातत्याने बोलत आहेत. गेल्या वर्षी आम्ही यातली नावे दिली होती, ऑगस्टमध्ये आठवण करून दिली आणि आता नवी यादी सादर केली आहे.”

हेही वाचा

वाशी (vashi) येथील एपीएमसी फळ बाजारात यंदा दिवाळीच्या दिवशी देवगडमधून आलेल्या हापूस आंब्याच्या (alphonso mangoes) पेटीने विक्रमी दराचा नवा इतिहास रचला आहे.

देवगड तालुक्यातील पडवणे येथील आंबा बागायतदार प्रकाश धोंडू शिर्सेकर यांनी पाठवलेल्या सहा डझन हापूस आंब्यांच्या पेटीला तब्बल 25 हजार रुपयांचा दर मिळाला.

फळबाजारातील व्यापाऱ्यांच्या मते, हा वाशी एपीएमसीच्या (APMC) इतिहासातील हापूस आंब्याला मिळालेला सर्वाधिक उच्चांकी दर ठरला आहे. दरवर्षी साधारणपणे नोव्हेंबर-डिसेंबर महिन्यात ‘मुहूर्ताचा हापूस’ बाजारात दाखल होत असतो.

मात्र यंदा विशेष म्हणजे हा आंबा ऑक्टोबर महिन्यातच, तेही दिवाळीच्या (diwali) दिवशी दाखल झाला. लक्ष्मीपूजनाच्या दिवशी नानाभाऊ जेजुरकर अँड कंपनी यांच्या स्टॉलवर या आंब्याची पूजा करण्यात आली.

व्यापाऱ्यांच्या मते, दिवाळीच्या दिवशी हापूस आंबा बाजारात दाखल होण्याची ही पहिलीच वेळ आहे.

सदर आंबा त्यावेळी कच्चा होता, त्यामुळे पूजा करून तो पिकण्यासाठी ठेवण्यात आला होता. नंतर तो पिकल्यानंतर बोली लावण्यात आली आणि तेव्हाच या आंब्याच्या पेटीला विक्रमी 25 हजार रुपयांचा दर मिळाला, अशी माहिती व्यापारी हर्षल जेजुरकर यांनी दिली.

यापूर्वी कोकणातून एपीएमसी बाजारात दाखल होणाऱ्या ‘मुहूर्ताच्या’ हापूस आंब्यांना 20 ते 22 हजार रुपयांपर्यंत दर मिळत होता. त्यामुळे यंदा मिळालेला 25 हजार रुपयांचा दर हा आतापर्यंतचा सर्वोच्च विक्रम ठरला आहे.

हेही वाचा