महाराष्ट्र सरकारने (Government of Maharashtra) ने 1 एप्रिल 2019 पूर्वी नोंदणीकृत वाहनांवर हाय सिक्युरिटी रजिस्ट्रेशन प्लेट (HSRP) बसविण्याची मुदत आता 30 जून 2026 पर्यंत वाढवली आहे. त्यामुळे राज्यातील लाखो वाहनधारकांना नियमांचे पालन करण्यासाठी अतिरिक्त वेळ मिळाला आहे.
यापूर्वी HSRP बसविण्याची अंतिम मुदत 31 डिसेंबर 2025 निश्चित करण्यात आली होती. मात्र महाराष्ट्रभर HSRP बसविण्याच्या प्रक्रियेचा आढावा घेतल्यानंतर मोठ्या प्रमाणावर जुन्या वाहनांवर अद्याप प्लेट बसविण्यात आलेल्या नसल्याचे समोर आले. त्यानंतर राज्य सरकारने मुदतवाढ देण्याचा निर्णय घेतला.
राज्याचे परिवहन मंत्री प्रताप सरनाईक (Pratap Sarnaik) यांनी बुधवारी सांगितले की, वाहनधारकांची गैरसोय टाळण्यासाठी आणि सुरक्षा प्रणालीची व्यापक अंमलबजावणी सुनिश्चित करण्यासाठी ही मुदतवाढ देण्यात आली आहे.
HSRP म्हणजे विशेष सुरक्षा वैशिष्ट्यांसह असलेली नंबर प्लेट असून ती वाहन चोरी, बनावट नंबर प्लेट आणि गुन्हेगारी कारवायांवर नियंत्रण ठेवण्यासाठी महत्त्वाची मानली जाते. राज्य सरकारने वाहनधारकांना दिलेल्या नव्या मुदतीपूर्वी HSRP बसवून घेण्याचे आवाहन केले आहे.
हेही वाचा
