रुग्णांची वाढती संख्या लक्षात घेऊन भिवंडीतील बीजीपी रुग्णालयाच्या (BGP Hospital) बाह्यरुग्ण विभागाच्या (OPD) कामकाजाचे दिवस आठवड्यातील पाच दिवसांवरून सहा दिवसांपर्यंत वाढवण्यात आले आहेत. भिवंडी–निजामपूर शहर महानगरपालिकेने स्थानिक नागरिकांना अधिक सुलभ वैद्यकीय सेवा मिळाव्यात यासाठी हा निर्णय घेतला आहे.
पूर्वी ओपीडी सोमवार ते शुक्रवार सकाळी 9 ते सायंकाळी ४4 या वेळेत सुरू होती. आता ती शनिवारी सकाळी 9 ते दुपारी 1 या वेळेतही सुरू राहणार आहे. मात्र सार्वजनिक सुट्टीच्या दिवशी सेवा बंद राहतील. रुग्णसंख्या वाढल्यामुळे हा निर्णय घेण्यात आला असून, सुरुवातीला दररोज 15 ते 20 रुग्ण येत होते. तर आता ही संख्या 200 ते 250 पर्यंत पोहोचली आहे.
या रुग्णालयात सर्वसाधारण ओपीडी तपासणी, आपत्कालीन तपासणी, बाल लसीकरण, एआरव्ही (ARV) इंजेक्शन, तसेच संसर्गजन्य आजारांची तपासणी अशा विविध सेवा उपलब्ध आहेत. रुग्णालयात स्त्रीरोग, बालरोग, दंतचिकित्सा आणि मायक्रोबायोलॉजी या क्षेत्रातील तज्ज्ञ डॉक्टरांसह अनेक एमबीबीएस डॉक्टर कार्यरत आहेत.
याशिवाय येथे 50 खाटांचे पूर्ण सुसज्ज रुग्णालय उभारण्याचे काम सुरू असल्याची माहिती अधिकाऱ्यांनी दिली. मात्र काही प्रशासकीय मंजुरी प्रलंबित असल्यामुळे ते अद्याप कार्यान्वित झालेले नाही.
नागरिकांनी अधिकृत महानगरपालिका आरोग्य सेवांचा वापर करावा आणि अनधिकृत वैद्यकीय उपचार करणाऱ्यांपासून दूर राहावे, असे आवाहन प्रशासनाने केले आहे.
हेही वाचा
