दक्षिण मुंबईतील कफ परेड परिसरातील मच्छिमार नगर परिसरातील एका चाळीत पहाटे 4 वाजता भीषण आग लागली. या आगीत 15 वर्षांच्या मुलाचा मृत्यू झाला आहे. इतर तिघे गंभीर जखमी झाले आहेत. जखमींना जवळच्या सेंट जॉर्ज रुग्णालयात दाखल करण्यात आले आहे, त्यापैकी एकाची प्रकृती गंभीर आहे.
कफ परेड परिसरातील कॅप्टन प्रकाश पेठे रोडवरील एका चाळीत आज सकाळी आग लागली. आगीची माहिती मिळताच बृहन्मुंबई महानगरपालिका (बीएमसी) अग्निशमन दल घटनास्थळी पोहोचले. पहाटे 4.35 वाजेपर्यंत आग विझवण्यात आली.
चाळीतील 1+1 घराच्या वरच्या मजल्यावर आग लागली. काही मिनिटांतच आग चाळीतील इतर घरांमध्ये पसरली. परंतु अग्निशमन दलाने तातडीने घटनास्थळी पोहोचून काही मिनिटांतच आग आटोक्यात आणली. तथापि, या अपघातात एका मुलाचा मृत्यू झाला, तर इतर तीन जण जखमी झाले.
आगीचे कारण काय होते?
सुरुवातीला ही आग फटाक्यांमुळे लागली असल्याचा संशय होता. मात्र, प्राथमिक तपासानंतर असे सांगण्यात आले की, ही आग शॉर्ट सर्किटमुळे लागली असावी.
पोलिस आणि अग्निशमन विभाग या प्रकरणाची चौकशी करत आहेत. चौकशीनंतर आगीचे खरे कारण समोर येईल. तथापि, आगीच्या घटनेमुळे सदर चाळीतील लोकांमध्ये भीतीचे वातावरण निर्माण झाले आहे. या घटनेमुळे कफ परेडसह आसपासच्या परिसरातही खळबळ उडाली आहे.
हेही वाचा
पेंग्विनमुळे राणी बागेला तीन वर्षांत ‘इतका’ फायदा
