लेखक: Karina Shah
ठाणे, २२ एप्रिल: जम्मू-काश्मीरमधील सुंदरतेसाठी प्रसिद्ध असलेल्या पहलगाममध्ये काल संध्याकाळच्या सुमारास अतिरेक्यांनी पर्यटकांच्या बसवर केलेल्या भ्याड गोळीबारात २७ पर्यटकांचा दुर्दैवी मृत्यू झाला आहे. या हल्ल्यात महाराष्ट्रातील ठाणे जिल्ह्यातील डोंबिवली शहरातील तीन पर्यटकांचा मृत्यू झाल्याची दुर्दैवी माहिती समोर आली आहे. या घटनेमुळे संपूर्ण राज्यात हळहळ व्यक्त केली जात आहे.
या हल्ल्याच्या पार्श्वभूमीवर ठाणे जिल्हा प्रशासन आणि राज्य शासन सतर्क झाले असून, मृतांच्या कुटुंबीयांना सर्वतोपरी मदत पोहचविण्यासाठी प्रयत्न सुरू केले आहेत. जिल्हा प्रशासनाने सांगितले की, या तिन्ही मृत पर्यटकांच्या कुटुंबियांना आवश्यक ती वैद्यकीय, आर्थिक व समुपदेशन सेवा तत्काळ उपलब्ध करून दिली जाईल.
याप्रसंगी ठाणे जिल्ह्यतील 40 पर्यटक तेथे होते. या हल्ल्यात डोंबिवली शहरातील नवापाडा, पांडुरंग वाडी आणि नांदिवली परिसरात राहणाऱ्या हेमंत जोशी, संजय लेले आणि अतुल मोने या तिघांचा मृत्यू झाल्याची माहिती मिळाली असून इतर 37 पर्यटक सुरक्षित आहेत. दहशतवाद्यांनी त्यांच्या बसवर अंदाधुंद गोळीबार केला, ज्यामुळे त्यांचा जागीच मृत्यू झाला. मृतांच्या नातेवाईकांना सर्व प्रकारची मदत तत्परतेने करण्यासाठी जिल्हा प्रशासन पूर्णतः कार्यरत आहे.
या हल्ल्याच्या पार्श्वभूमीवर जम्मू-काश्मिर येथे सुरक्षित असणाऱ्या ठाणे जिल्ह्यातील पर्यटकांची दि.23 एप्रिल 2025 दुपारी 2 वाजेपर्यंत प्राप्त माहिती पुढीलप्रमाणे:-
अनुष्का मोने (35 वर्षे), ऋचा मोने (18 वर्षे), मोनिका जोशी (45 वर्षे), ध्रुव जोशी (16 वर्षे), कविता लेले (46 वर्षे), हर्षल लेले (20 वर्षे), भुषण अशोक गोळे (39 वर्षे), ज्योती अशोक गोळे (36 वर्षे), आरव भुषण गोळे (8 वर्षे), विनोद विश्वास गोळे (41 वर्षे), माधुरी विनोद गोळे (41 वर्षे), विहान विनोद गोळे (11 वर्षे), स्वाती विश्वास गोळे (36 वर्षे), अतुल प्रकाश सोनवणे (42 वर्षे), प्रियंका अतुल सोनवणे (34 वर्षे), अनन्या अतुल सोनवणे (12 वर्षे), अर्णव अतुल सोनवणे (8 वर्षे), नंदकुमार म्हात्रे (65 वर्षे), निलिमा म्हात्रे (65 वर्षे), निशांक म्हात्रे (31 वर्षे), प्रमदा पाटील (30 वर्षे), सुजन पाटील (63 वर्षे), आशा पाटील (60 वर्षे), नेहा ठाकूर (35 वर्षे), मनोज ठाकूर (39 वर्षे), विहान ठाकुर (07 वर्षे), संजय म्हात्रे (58 वर्षे), स्वाती म्हात्रे (49 वर्षे), नेत्रा भूषण पांगेरकर (37 वर्षे), भूषण इंद्रनाथ पांगेरकर (40 वर्षे), इंद्रायणी इंद्रनाथ पांगेरकर (65 वर्षे), श्लोक भूषण पांगेरकर (12 वर्षे), विहान देवेन ढोलम (05 वर्षे), गौरव सांगळे (37 वर्षे), दिपाली सांगळे (35 वर्षे), स्वाती सांगळे (40 वर्षे), वेद सांगळे (07 वर्षे), शुभ क्षीरसागर (10 वर्षे), मनाली प्रणय ठाकूर (28 वर्षे), प्रणय ठाकूर (29 वर्षे).
राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, मुख्य सचिव सुजाता सौनिक, विभागीय आयुक्त डॉ. विजय सूर्यवंशी तसेच ठाणे जिल्हाधिकारी अशोक शिनगारे या घटनेची गंभीर दखल घेत आहेत. त्यांनी प्रशासनाला मृतांच्या नातेवाईकांना आवश्यक ती सर्व मदत तातडीने पोहचविण्याचे निर्देश दिले आहेत.
या दरम्यान, जिल्हा आपत्ती व्यवस्थापन प्राधिकरणाने नागरिकांना आवाहन केले आहे की, जर पहलगाममध्ये त्यांच्या ओळखीतील किंवा कुटुंबातील कोणी व्यक्ती अडकलेले असतील तर त्यांनी तातडीने खालील हेल्पलाइन क्रमांकांवर संपर्क साधावा:
- ९३७२३३८८२७
- ७३०४६७३१०५
श्रीनगरमध्ये पर्यटकांसाठी २४x७ मदत कक्ष कार्यान्वित करण्यात आले असून, जिल्हा मुख्यालयातील जिल्हाधिकारी कार्यालयात आपत्कालीन नियंत्रण कक्ष आणि मदत डेस्क स्थापन करण्यात आले आहे. हे कक्ष २४ तास कार्यरत राहणार असून पर्यटकांना आवश्यक ती माहिती, मदत व मार्गदर्शन याठिकाणी दिले जाणार आहे.
या मदत कक्षांचे दूरध्वनी व व्हॉट्सअॅप क्रमांक पुढीलप्रमाणे:
- दूरध्वनी क्रमांक:
०१९४-२४८३६५१
०१९४-२४५७५४३ - व्हॉट्सअॅप क्रमांक:
७७८०८०५१४४
७७८०९३८३९७
राज्य सरकार आणि जिल्हा प्रशासन या हल्ल्याचा तपशीलवार अहवाल तयार करत असून, या घटनेतील जबाबदार दहशतवाद्यांविरुद्ध कठोर कारवाई करण्याची मागणी वाढीस लागली आहे. केंद्रीय गृहमंत्रालयाकडूनही या घटनेची गंभीर दखल घेण्यात आली असून, सुरक्षा यंत्रणांना अधिक सतर्क राहण्याचे आदेश देण्यात आले आहेत.
या हल्ल्यामुळे डोंबिवली शहरासह संपूर्ण ठाणे जिल्ह्यात शोककळा पसरली आहे. सामाजिक संस्था, स्थानिक लोकप्रतिनिधी व विविध संघटनांनी मृतांच्या कुटुंबीयांप्रती सहवेदना व्यक्त करत केंद्र व राज्य सरकारकडे ठोस कारवाई करण्याची मागणी केली आहे. शहरातील अनेक ठिकाणी श्रद्धांजली सभा घेतल्या जात आहेत.
संपूर्ण भारतभरातून या अमानवीय कृत्याचा तीव्र निषेध व्यक्त करण्यात येत असून, देशभरात या हल्ल्याविरोधात संताप व्यक्त होतो आहे. सामान्य नागरिकांनीही आपल्या प्रियजनांच्या सुरक्षेसाठी प्रशासनाने दिलेल्या सूचना व सूचना केंद्रांवर लक्ष ठेवण्याचे आवाहन केले आहे.
या घटनेत मृत्युमुखी पडलेल्या तिन्ही पर्यटकांच्या आत्म्यास शांती लाभो आणि त्यांच्या कुटुंबियांना या दु:खद प्रसंगात धैर्य मिळो, हीच प्रार्थना सर्वत्र केली जात आहे.
