जिल्हाधिकारी कार्यालय ठाणे येथे भाजप सरकार विरोधात काँग्रेसचे निषेध आंदोलन
सागर कदम
ठाणे : केंद्रातील मोदी सरकारच्या कारभाराविरोधात ठाणे जिल्ह्यातील काँग्रेस पदाधिकाऱ्यांनी जोरदार आवाज उठवला आहे. नॅशनल हेरॉल्ड प्रकरणी काँग्रेस नेत्या सोनिया गांधी आणि विरोधी पक्षनेते राहुल गांधी यांच्या विरोधात केंद्र सरकारकडून सूडबुद्धीने सुरू झालेल्या तपासाची काँग्रेसने तीव्र शब्दांत निंदा केली आहे. या विरोधात आज जिल्हाधिकारी कार्यालय ठाणे येथे ठाणे शहर जिल्हा काँग्रेस आणि ठाणे ग्रामीण जिल्हा काँग्रेस यांच्या वतीने एक भव्य निषेध आंदोलन करण्यात आले.
या आंदोलनात काँग्रेसचे शेकडो कार्यकर्ते, पदाधिकारी आणि समर्थक सहभागी झाले होते. महाराष्ट्र प्रदेश काँग्रेसचे प्रदेशाध्यक्ष हर्षवर्धन सपकाळ यांच्या आदेशानुसार हे आंदोलन आयोजित करण्यात आले होते. ठाणे शहर जिल्हाध्यक्ष विक्रांत चव्हाण व ठाणे ग्रामीण जिल्हाध्यक्ष दयानंद चोरघे यांच्या नेतृत्वाखाली या आंदोलनाचे आयोजन करण्यात आले.
या आंदोलनाला काँग्रेसचे राष्ट्रीय सचिव आणि कोकण विभागाचे प्रभारी श्री. वेंकटेश यांनी विशेष मार्गदर्शन केले. तसेच महाराष्ट्र प्रदेश महिला काँग्रेसच्या प्रदेशाध्यक्षा संध्याताई सव्वालाखे यांनी उपस्थित राहून महिलांचा मोठा सहभाग सुनिश्चित केला. आंदोलनात ठाणे शहर, ठाणे ग्रामीण, कल्याण शहर, भिवंडी शहर व उल्हासनगर शहर या सर्व जिल्ह्यांतील काँग्रेसचे प्रमुख पदाधिकारी, कार्यकर्ते आणि युवकांनी मोठ्या संख्येने सहभाग घेतला.
या आंदोलनाच्या माध्यमातून काँग्रेस पक्षाने केंद्र सरकारवर तीव्र हल्ला चढवला. सोनिया गांधी आणि राहुल गांधी यांच्यावर करण्यात आलेली चौकशी ही केवळ राजकीय द्वेषातून आणि विरोधकांना नामोहरम करण्याच्या उद्देशाने केली जात आहे, असा आरोप काँग्रेसने केला आहे. विरोधी पक्षांचे आवाज दडपण्यासाठी केंद्र सरकार विविध तपास यंत्रणांचा वापर करत असून ही प्रक्रिया म्हणजे लोकशाहीच्या मूल्यांची पायमल्ली आहे, असे आंदोलनकर्त्यांचे म्हणणे होते.
ठाण्यातील जिल्हाधिकारी कार्यालयाजवळ झालेल्या या आंदोलनात विविध स्तरांतील कार्यकर्त्यांनी आपल्या भावना प्रकट केल्या. “भाजप सरकार हुकूमशाहीकडे वाटचाल करत आहे. विरोधकांना वेठीस धरण्याचे प्रयत्न केले जात आहेत. संविधानाच्या रक्षणासाठी आणि लोकशाही टिकवण्यासाठी काँग्रेस उभी आहे आणि राहणार,” असे ठणठणीत शब्दांत वक्तव्य आंदोलनकर्त्यांनी केले.
या निषेध आंदोलनादरम्यान कार्यकर्त्यांनी हातात फलक घेऊन “लोकशाही वाचवा”, “सत्याग्रह आमचा मार्ग आहे”, “सोनियाजी गांधी व राहुलजी गांधी यांच्यावर अन्याय थांबवा” असे जोरदार घोषणाबाजी केली. यामुळे संपूर्ण परिसरात आंदोलनाचे वातावरण तयार झाले होते. पोलिसांनी मात्र सुरक्षेची चोख व्यवस्था केली होती आणि शिस्तबद्धपणे आंदोलन पार पडले.
या आंदोलनात युवक काँग्रेस, महिला काँग्रेस, सेवादल, एनएसयुआय, इंटक, ओबीसी सेल, एससी-एसटी विभाग, अल्पसंख्याक विभाग, व्यापारी सेल, आणि इतर अनेक आघाड्यांचे पदाधिकारी सहभागी झाले. त्यांनी एकात्मतेने आवाज उठवून केंद्र सरकारच्या विरोधात तीव्र संताप व्यक्त केला.
काँग्रेसच्या नेत्यांनी आंदोलनस्थळी पत्रकारांशी संवाद साधताना सांगितले की, “नॅशनल हेरॉल्ड प्रकरण हे अनेक वर्षांपासून चर्चेत आहे, पण त्यातून कोणताही भ्रष्टाचार सिद्ध झालेला नाही. तरीही भाजप सरकारने फक्त राजकीय हेतूने, गांधी कुटुंबाला बदनाम करण्यासाठी आणि जनतेच्या मनात गैरसमज निर्माण करण्यासाठी हे प्रकरण पुन्हा उकरून काढले आहे. हे राजकीय सूडाचे राजकारण आहे आणि काँग्रेस याला जोरदार विरोध करेल.”
काँग्रेसने यावेळी एक निवेदनही जिल्हाधिकारी कार्यालयात सादर केले. या निवेदनात त्यांनी केंद्र सरकारच्या कारवायांवर रोष व्यक्त करत, त्वरित चौकशी बंद करण्याची मागणी केली. विरोधी पक्षांना धमकावण्याच्या प्रयत्नांपासून दूर राहून सर्वसामान्यांच्या प्रश्नांवर लक्ष केंद्रित करावे, अशी मागणी निवेदनातून करण्यात आली.
या आंदोलनाच्या निमित्ताने ठाणे जिल्ह्यात पुन्हा एकदा काँग्रेस पक्षाने आपली एकजूट व जनतेप्रती बांधिलकी दाखवली. सरकारकडून लोकशाही प्रक्रियेचा गैरवापर करून विरोधकांना दाबण्याचे प्रकार वाढत आहेत. याला काँग्रेस शांतपणे पण ठामपणे विरोध करत आहे. गांधीजींच्या सत्याग्रहाच्या मार्गाने हा लढा काँग्रेस पुढे नेणार असून, देशाच्या लोकशाहीला वाचवण्यासाठी ही भूमिका अत्यंत आवश्यक आहे, हे काँग्रेसने ठाणेतील आंदोलनातून अधोरेखित केले आहे.
ही केवळ सुरुवात आहे, अशी भावना अनेक नेत्यांनी व्यक्त केली. “सत्य आणि संविधानाच्या रक्षणासाठी काँग्रेसचा संघर्ष सुरूच राहील,” अशा निर्धाराने निषेध आंदोलनाचा समारोप झाला.
लेखक : सागर कदम
