ऑनलाइन सातबार्‍याचा सर्व्हर पाच दिवस डाऊन ! सोसायटी, खरेदी-विक्री व्यवहार करणार्‍यांचा खोळंबा
राज्यातील ऑनलाइन सातबारा सॉफ्टवेअरमध्ये दुरुस्ती करण्यासाठी तब्बल पाच दिवस ऑनलाइन सातबार्‍याची सुविधा बंद ठेवण्यात आली. हा सर्व्हर पाच दिवस डाऊन असल्याने शेतकरी, खरेदी-विक्री व्यवहार करणारे व अन्य व्यावसायिकांचा मात्र प्रचंड खोळंबा झाला.
एप्रिल महिन्यात गावोगाव सोसायटी काढण्यासाठी शेतकर्‍यांची प्रचंड लगबग सुरू असते. मार्चअखेर सोसायटी भरण्यासाठी अनेक शेतकरी 15 दिवसांसाठी टक्केवारीने पैसे उचलतो. यामुळेच एप्रिल महिन्यात पहिल्या आठ ते दहा दिवसांत सोसायटी मिळावी, यासाठी शेतकर्‍यांची प्रचंड धावपळ सुरू असते. यासाठी ऑनलाइन चालू सातबारा व 8-अ सोसायटीत जमा करणे बंधनकारक असते. त्यानंतरच संबंधित शेतकर्‍याला सोसायटी (म्हणजेच पीक कर्ज) किती द्यायची, हे त्या शेतकर्‍याच्या, खातेदाराच्या नावावर किती क्षेत्र आहे, यावर रक्कम ठरवली जाते. यासाठी ऑनलाइन साताबारा व 8-अ मिळावा, यासाठी गावोगाव शेतकरी तलाठी कार्यालय व सुविधा केंद्रात हेलपाटे मारत असतो. पण, ऐन हंगामात शासनाने ऑनलाइन सातबारा सॉफ्टवेअर दुरुस्तीसाठी काढले. यामुळेच गेल्या पाच दिवसांपासून ऑनलाइन सातबार्‍याचा सर्व्हर डाऊन होता.
बुधवारी (दि. 16) दुपारनंतर ही साइट सुरू झाली खरी; पण एकाच वेळी मोठ्या प्रमाणात सातबारे डाऊनलोड होत असल्याने संकेतस्थळ खूपच हळू सुरू होते. यामुळे गेल्या चार ते पाच दिवसांपासून ग्रामीण भागात गावोगाव शेतकऱ्यांचा प्रचंड खोळंबा झाला व अनेकांना मनस्ताप देखील सहन करावा लागला.
हस्तलिखित सातबारा शासनाने 2016 पासूनच बंद केला आहे. यामुळेच आता कोणत्याही अधिकृत कामासाठी, बँकेत कर्ज काढण्यासाठी चालू ऑनलाइन सातबाराच गृहीत धरला जातो. ऑनलाइन सातबार्‍याची साइट गेल्या चार-पाच दिवसांपासून मेंटेनन्ससाठी बंद असल्याने तलाठ्यांना देखील शेतकर्‍यांना सातबारा देता आला नाही. आता शनिवार वार (दि. 19) पासून ही साइट पुन्हा सुरळीत सुरू होईल.
अमोल शेलार, तलाठी, राजगुरुनगर
